香港乒乓總會活動返嚟嘞！因為疫情關係，一班球員餓咗波咁耐，終於可以打番波啦！除咗海外賽事已宣布會陸續復賽外，而家先等我哋一齊嚟數吓嚟緊有幾多項精彩本地活動先丫！

打頭陣嘅會係恒生精英隊，同埋恒生少兒精英隊嘅訓練，會於9月17日(四)重啟訓練。早前已經完成報名嘅香港青少年隊都會於下月進行甄選。另外，香港青少年隊訓練，同埋青苗訓練計劃最快亦會喺10月份展開，一眾青少年潛質球手可以再次站到舞台上發揮所長，期待他們在未來發光發亮。

10月份有一連3日舉行的第二次「港乒擂台賽」，到底「鎮廷隊」同「凱琹隊」今次仲可唔可以「冧莊」呢？港乒精英都會拼盡全力爭奪高達30萬元的獎金，賽事亦會進行直播，讓大家安坐家中都可以欣賞到香港隊在這段「閉關」訓練期間的成果。

年底嘅活動亦都相當老少咸宜，除咗特別為9歲或以下小球員而設的恒生新一代乒乓大比拼，同埋「一生只得一次」的少兒打吡大賽（只限11歲球員參加）之外，仲會有成人乒乓球進修班，以及老友記乒乓球訓練班，記得留意返唔同活動嘅報名時間呀！諗住考章別考試嘅朋友都留意返，呢個月29號就可以報名㗎啦，考試會於今年12月舉行。

踏入2021年，乒乓球的精彩賽事亦會陸續送上，最精彩刺激、最令球迷期待嘅全港公開單項錦標賽會於明年1月舉行，賽事會喺今年11月開始報名，有興趣報名球手記得記低日期嘞。1月仲會有新一代乒乓球訓練班，同埋乒乓球進修班； 至於球會聯賽將暫定會喺明年3月展開。

乒總亦提提大家，面對當前疫情，大家的防疫工夫記得要做足。球員喺室內進行運動的時候，9月18日開始可以豁免戴上口罩，但教練、工作人員就記緊要戴上口罩，這樣就能在享受乒乓球樂趣之餘，同時將病毒傳播風險減至最低。政府最新體育活動處所防疫措施指引，請按此。

 香港乒乓總會活動重啓，活動時間表請按此。

以上活動詳情，請留意本會網頁最新消息。